Verein
Schwarzmeerzunft Bäuch
Schnitzelbank 2009
1
Ou d' Bäucher Fasnecht sig ir Krise, muess me ghöre
Die locki jo kei Sau me hingerem Ofe füre
Statt Narretribe suuri Gringe und es Gränn
Trotz allem singe mir hüt z'Obe: Yes we can!
2
Und üsi Schwarzmeer-Aktie si jetz nur no Schrott
Will die Papier bigott kei Mönsch me chaufe wott
Ou uf der Schissirolle wei si nid rächt laufe
Die chöi mir nume no der UBS verchaufe
3
Die neui Weschtumfahrig finge mir e Hit
Dank dere Strecki bisch i churzer Zit scho wit
Und wenn die alti Boustell-strecki dir mol fählt
Fahrsch eifach paarmol hin und här im Kaselfäld
4
Vo Johr zu Johr wirds mit der Fasnacht z'Bäuch gäng bitterer
Der Publikumsufmarsch vo Beiz zu Beiz gäng schitterer
Drum si mer nid erstunt - es Zeiche vo der Zyt
Dass es der Brunnemeister Fasnacht nümme git
5
Wo si mir Schwizer ächt die beschte uf der Wält
Es Team wo alles gwünnt het eus bis jetz no gfählt
Doch öpper hett die Spitzeleistig ändlech gschafft
S'isch d'Armee-Chuchicheffe-Nationalmannschaft
6
Aus rächte Schwizer hani hüür ou wieder müesse
Wie jedes Johr s'Obligatorische go schiesse
Enttüscht und gfruschtet bini gli scho wieder hei,
Drühundert Meter breichsch jetz nie mit Pfäfferspray!
7
Der Paris Hilton ihre Goof sett London heisse
Will sie dört gärn verchehrt, mir finge das zum göisse
Und wände mir für üs die glichi Regle a
Muess üses Ching der Name "Tränebänkli" ha
8
Dä Künschtler do, dä ärmscht, dä isch total bankrott
Will niemer sini neue Kunschtwärch choufe wott
Mir wüsse scho worum und mache jedi Wett,
Dass är im letschte Johr nur Aktie zeichnet het.
9
Vorem Ueli Murer isch üs nid so bang
Mir wüsse drum, dä gits jo sowieso nid lang
Är het jo sälber gseit, är heig scho wieder s'Risse
Und wöug im Summer uf der Alp is Gras go bisse
10
Es rigoroses Rauchverbot herrscht i de Beize
Und das isch d'Ursach dass me d'Raucher tuet verheize
Jetz stärbe d'Raucher nümme nur am Chräbs ir Lunge
Me heig scho paar verfrore vor der Türe gfunge
11
D' Gränchner heige schints sit färn es Geischterhus
Das macht ne Angscht und 's wird ne bang es isch e Gruus
Si schreie zettermordio - mir wüsses besser
S' isch nur der Lade vom Bestatter Ruedi Messer
12
I warte ufe Bus bim Hübeli voruss
I warte warte warte warte - 's chunnt kei Bus
Do chunnt mir z'Sinn, dä hautet jo, bin ig e Dubu
Nümme bim Hübeli, är hautet ufem Hubu
13
Z'erscht hetts gheisse s'gäb se no bis ändi Joor
Denn chunnt's is dicker, nümm so chrumm und komisch vor
Und nid nur d'Prominänz öu mir - mir hange dra
Der ganze Schwiiz isch si nid wurscht - die Servela
14
Schöni Ouge, längi Bei, e tolle Buuse
Mini Troumfrou loht mi nümme ruehig pfuuse
Es macht mi stolz wenn angeri noch ihre schiele
Aber nume ig darf mit mim Barbie spiele
15
E Meter Schnee und d'Sunne schint, he chumm mir wei
Zäme hüt go schlittle ufe Wissestei:
Doch d'Bahn wird revidiert, der Schlittuwäg isch zue
Und s'Kurhuus gschlosse - und der Wirt het sini Rueh
16
Gletscherschmelzi, Stelleabbau, s'isch konfus
Bankekrise, Wirtschaftsflaute, s'Gäld geit us
Überall isch Elend, Chrieg es isch es Drama
Ir Zuekunft chasch das alls vergässe - dank Obama
17
Dr Jeremias Gotthälf isch uf d'Ärde cho
Är schribi no es Buech hett är verlute loo
Uf d'Froog öb das äch nötig sig do meint ganz stur är
Nach em Chnächt und Pächter fählt: Ueli der Murer
18
Die Hochlandrinder hei nid welle Weiher putze
Die Aktion hett nume g'choscht und bringt kei Nutze
Me heig dört hing hei Weiherbuech und Zytig brichtet
Näbscht Silberreiher au no schregi Vögu gsichtet
19
Wott me am Wuchenändi mou so richtig feschte
Chame is Kofmäuh go im Soledurner Weschte
Und findet z'Bäuch e Mou es luschtigs Feschtli statt
Chasch sicher si de isch das i der Leuematt
20
Eusi Melodie isch simpel und nid schwär
Si git au musikalisch nid der Huufe här
Der Text dä chame ohni grossi Müeh erfasse
Drum würdi das aus gröschte Schwizer Hit no passe
Schnitzelbankruppe 2004